Eyðimerkurstormur á Tenerife

Eyðimerkurstormur á Tenerife

Þessa dagana gengur eyðimerkurstormur eða sandstormur yfir Kanaríeyjar sem hefur meðal annars valdið röskun á flugi. Alls hefur yfir 200 flugferðum verið seinkað eða aflýst til og frá eyjunum, sem hefur haft áhrif á ferðir um 20.000 farþega, þar á meðal Íslendinga. Flugvellinum á Gran Canaria var lokað tímabundið og mikil röskun var á flugi frá báðum flugvöllum Tenerife. Flugvöllurinn á suðurhluta Tenerife (TFS) hefur verið lokaður mestallan sunnudaginn en hann verður vonandi opnaður strax eftir helgi. Einhverjir þurftu að lenda á Fuerteventura í staðinn en sú eyja er næst Afríku, við hliðina á Gran Canaria. Stormurinn hefur líka haft áhrif á karnivalið og var hluta af dagskrá helgarinnar aflýst, enda fer það að mestu fram utandyra.

Vegna tafa á flugi er farþegum bent á að fylgjast með fréttum frá sínu flugfélagi, þar sem það geta orðið nokkurra daga seinkanir á flugi til og frá Íslandi. Hér er heimasíða flugvallarins á Suður-Tenerife (TFS).

Sahara-eyðimörkin vildi líka fara til Tenerife. Mynd Canarias 7.

Calima

Þetta veðurfyrirbæri kallast calima á spænsku. Það fylgir því hærri hiti og rok en calima er almennt hættulaust. Það gengur oftast yfir á 1-3 dögum. Calima er sérstakt veðurfar sem fylgir yfirleitt vetrinum en er þó ekki mjög oft yfir árið. Íbúar Kanaríeyja hafa ekki upplifað svona kröftugt calima síðan 2002 en þá þurfti líka að fella niður fjölmörg flug, bæði vegna sandmisturs og roks.

Venjulega er fólki með öndunarfærasjúkdóma ráðlagt að halda sig inni og fólk hefur getað hagað sér eins og þegar það er sandrok á Íslandi. En þar sem calimað núna (febrúar 2020) er óvenju slæmt, hefur fólki verið ráðlagt að halda sig inni þar til loftgæðin lagast.

Fjölmörg útköll hafa verið vegna stormsins og hafa vindhviður mælst allt að 120 km/klst (33 m/s) á Tenerife. Það kallast ofsaveður á Íslandi.

Viðtal: Hefði frekar búist við því að það yrði ó­fært í Keflavík en á Tenerife

Meira um veðrið á Tenerife hér.