Norður-Tenerife
Það er algjörlega þess virði að fara í skoðunarferðir um eyjuna, hvort sem farið er á eigin vegum, í bílaleigubíl eða rútu, eða með íslenskum fararstjórum sem gjörþekkja eyjuna. Aðal ferðamannasvæðið er á suðurhluta Tenerife vegna þess að þar er sólríkara. Á Norður-Tenerife eru borgir og bæir með ekta spænsku mannlífi, veitingastöðum, kaffihúsum, og fallegum byggingum. Stærstu borgir Tenerife eru allar á norðurhlutanum; höfuðborgin Santa Cruz, háskólabærinn La Laguna, og Puerto de la Cruz.
Á norðurhlutanum eru golfvellir, Anaga fjallgarðurinn, Loro Parque dýragarðurinn, verslanamiðstöðvar og margt fleira.
El Teide
![](https://i0.wp.com/tenerife.is/wp-content/uploads/2022/02/IMG_5607-2_el_teide_eldfjall_tenerife_volcano_nordur.jpg?resize=640%2C314&ssl=1)
Eyjan er lítil en samt er ótrúlega mikill munur á gróðri og veðri, sérstaklega á veturna. Þriðja stærsta eldfjall í heimi, El Teide, er á miðri eyjunni og það hefur áhrif á veðurfarið. Það rignir sjaldan á suðurhlutanum og þar skín sólin nær alla daga ársins. Á norðurhlutanum er sólríkt þótt það rigni oftar. En það verður til þess að gróðurinn er einstaklega fallegur þar. Það er engin tilviljun að næstelsti grasagarður Spánar, El Botánico, er í bænum Puerto de la Cruz.
![Göngustígur að strönd Puerto de la Cruz](https://i0.wp.com/tenerife.is/wp-content/uploads/2021/07/shutterstock_1072836935_tenerife_puerto_de_la_cruz_strond_tene_skodunarferdir_nordur.jpg?resize=640%2C428&ssl=1)
Á ferðamannasvæðinu á suðurhlutanum og í höfuðborginni Santa Cruz talar flest þjónustu- og afgreiðslufólk ensku en þegar aðrir hlutar eyjunnar eru heimsóttir má gera ráð fyrir að þurfa að nota orðabók eða Google translate.
![](https://i0.wp.com/tenerife.is/wp-content/uploads/2022/02/Tenerife_hjolaleidir_hjolreidar_hjolaferdir_gonguferdir.jpg?resize=640%2C427&ssl=1)
Það er einnig flugvöllur á norðurhluta Tenerife, Tenerife Norte. Hann er bæði fyrir innanlandsflug (innan Spánar) og millilandaflug. Þegar flogið er frá Íslandi er lent á flugvellinum fyrir sunnan, Tenerife Sur (TFS).