Langtímaleiga

Stundum duga bara ekki 2 vikur.

Það er orðið erfiðara en áður að finna íbúðir í langtímaleigu. Þess vegna þarf að gefa sér góðan tíma í leitina. En það er um að gera að skoða líka aðra bæi en þá eftirsóttustu. Tenerife er skiljanlega mjög vinsæll staður, sérstaklega meðal Evrópubúa sem vilja búa í hlýrra loftslagi yfir veturinn eða geta unnið fjarvinnu.

Eyjan er lítil, þannig að það eru aldrei mjög langar vegalengdir sem þarf að fara. Til dæmis tekur oftast aðeins um klukkustund að aka að ferðamannasvæðinu ef þið búið alveg hinum megin á eyjunni. En það má reikna með umferðarteppum þegar þið nálgist það.

Ef þið þekkið eyjuna ekki vel þá er best að skoða Google Maps til að finna út vegalengd að næstu matvöruverslun og þjónustu. Líka til að skoða hvar strætó (TITSA) stoppar, ef þið ætlið ekki að vera á bíl.

Það er sniðugt að dvelja fyrstu vikurnar á hóteli eða leigja íbúð hjá Airbnb eða Booking, meðan leitað er að rétta svæðinu eða íbúð. Sérstaklega ef planið er að vera lengur en 3 mánuði.

Hvar er best að búa?

Staðsetning og verð fara eftir því hvort fólk vill vera á aðal ferðamannasvæðinu (Arona og Adeje) eða fyrir utan það. Íbúðir við Amerísku ströndina, Fanabe og Los Cristianos eru yfirleitt dýrari en annars staðar á eyjunni. Almennt eru íbúðir á ferðamannasvæðinu við sjóinn dýrari en íbúðir ofan við hraðbrautina, en það getur verið öfugt í öðrum bæjum, þ.e. dýrara hærra uppi þar sem er svalara loft.
Fyrir fólk sem vill vera nálægt ferðamannasvæðinu en samt aðeins fyrir utan, þá eru margir hrifnir af bæjunum Puerto de Santiago sem er á móti Los Gigantes-klettunum og El Médano. Aðrir bæir eru til dæmis Garachico, sem er sögufrægur bær, Las Galletas, El Porís, og San Isidro. Myndin efst á síðunni er af húsi á Airbnb, í Icod de los Vinos.
Ef ykkur langar að upplifa spænska menningu er líka hægt að vera í höfuðborginni Santa Cruz eða Puerto de la Cruz, Los Realejos, eða La Laguna, sem er með svipaðan íbúafjölda og Reykjavík. Fjölmennustu borgir Tenerife eru Santa Cruz og La Laguna.

Vetur á Tenerife

Ef þið eruð norðanmegin á eyjunni getur verið kalt á nóttunni yfir veturinn. Húsin eru þá yfirleitt hituð með gasofnum. Kosturinn er samt sá að veturinn á Tenerife er mjög stuttur. Desember til febrúar eru svölustu mánuðirnir. Þá getur hitinn farið niður í um 16° á nóttunni en getur líka verið um 21°. Veðrið á Tenerife hefur verið að breytast eins og annars staðar í heiminum, svo það er gott að hafa í huga að meðalhiti síðustu ára á ekki alltaf við.

Þjónusta

Það eru fjölmargir fallegir staðir sem koma til greina. Það er um að gera að skoða síðuna vel til að fá fleiri hugmyndir um staði. Líka til að átta sig á muninum á norður– og suðurhluta Tenerife. Svo er líka mismunandi hvaða þjónustu fólk þarf, (sjúkraþjálfun, pósthús, apótek o.s.frv.). Á Google maps er hægt að athuga hvaða þjónusta er í boði á hverjum stað. Hér eru leiðbeiningar um hvernig er best að leita.

Booking.com

Hvernig er best að finna íbúð?

Það er mismunandi hvað er innifalið í leigu. Það er tekið fram í hverri skráningu. Airbnb-íbúðir eru í flestum tilfellum með nettengingu og sjónvarp. Það getur verið betri kostur að leigja Airbnb-íbúð en venjulega íbúð ef þið eruð ekki viss um hvaða svæði þið viljið vera á. Og líka ef þið viljið prófa að gista á nokkrum stöðum en ekki vera á sama stað alla ferðina.

Smáa letrið: Ef beðið er um að leiga sé greidd fyrirfram inn á erlendan bankareikning þá millifærið alls ekki. Ef um svik er að ræða, er engin leið að rekja slóð peninganna.

Öruggustu greiðsluleiðirnar eru kreditkort (Visa/MasterCard) og Paypal því þá er hægt að ábyrgjast greiðslurnar.

Leigumiðlanir á Tenerife, Kanaríeyjum og Spáni

Hér eru vinsælustu og öruggustu leigumiðlanirnar sem fólk notar til að leita að íbúð á Spáni og Kanaríeyjum. Til gamans má geta þess að idealista var styrktaraðili Eurovision keppninnar 2022.

Leigumiðlanirnar eru líka oft með skrá yfir íbúðir til sölu á Spáni og Kanaríeyjum. Oftast er hægt að velja um tungumál, fyrir fólk sem talar ekki spænsku.

Smellið á nafn hér fyrir neðan til að fara á heimasíðu viðkomandi leigumiðlunar. Til að einfalda leitina, hafa sumar síðurnar verið stilltar þannig að þær opnast á leitarniðurstöðum fyrir íbúð með 1 svefnherbergi og stundum á tilteknu svæði. Heimasíða fotocasa opnast á leitarvél á ensku. Þegar heimasíðan opnast getið þið breytt leitinni eins og ykkur hentar.

Þegar þið hafið fundið íbúð, er best að hafa samband við viðkomandi leigumiðlun og spyrja um tryggingar. Athugið líka hvort það sé einhver aukakostnaður. Leigumiðlanir taka stundum þóknun sem samsvarar 1 mánaðarleigu.

Forðist að leigja íbúðir í gegnum grúppur á Facebook því það er svo mikið um íbúðasvindl þar.

Orðalisti

Á Spáni er gefinn upp herbergjafjöldi miðað við fjölda svefnherbergja, ólíkt Íslandi þar sem stofan er talin með. Ef þið eruð að leita að íbúð með 1 svefnherbergi þá er það einfaldlega 1 habitación (skammstafað hab) eða 1 dormitorio. Eldavélar eru annað hvort rafmagns eða gas.

Ef enska er ekki í boði, eru nokkur orð sem lærast fljótt þegar þið farið að leita að íbúð:

• Leigja = alquilar/alquiler  
• Kaupa = comprar
• Svefnherbergi = habitación/hab/dormitorio
• Baðherbergi = baños  
• Eða meira = o más 
• Svalir = balcón  
• Verð til-frá = precio desde-hasta

Leigusamningur

Yfirleitt þarf bara að sýna vegabréf þegar leigusamningur er gerður. Oftast þarf ekki að hafa spænska kennitölu (NIE). Passið ykkur á að millifæra aldrei fyrirframgreiðslu fyrir íbúð, nema þið hafið skoðað hana og séuð komin með samning. Ef þið eruð ekki viss hvort það sé í lagi að greiða, getið þið haft samband beint við leigumiðlunina sem viðkomandi íbúð er skráð hjá. Það er að segja; idealista, kyero, fotocasa, eða enalquiler.

Santa Cruz de Tenerife

Athugið að þegar leitað er að íbúðum á Tenerife, er eins og allar íbúðirnar séu í höfuðborginni Santa Cruz, en það er ekki þannig. Þetta er einfaldlega eins og hluti af nafni svæðisins innan Spánar, þ.e. Santa Cruz de Tenerife. Ef þið eruð ekki viss þá er best að setja nafn bæjarins eða allt heimilisfangið inn á Google Maps til að sjá rétta staðsetningu.