Öryggi & neyðartilvik

Öryggi & neyðartilvik

Neyðarnúmerið er 112 eins og á Íslandi. 

Aðstoð við Íslendinga erlendis – Borgaraþjónusta utanríkisráðuneytisins er með sólarhringsvakt í síma +354 – 545-0-112.

Hér gilda sömu almennu reglur og á Íslandi; allt í lagi að nota eigið veski en ekki skilja verðmæti eftir t.d. á borði veitingastaða meðan þið skreppið frá.

Þegar borgað er með kortiALDREI láta kortið úr augsýn. Ef afgreiðslumaður/kona vill fara með kortið bak við og þykist vera með bilaðan posa eða eitthvað álíka, fáið þá að fara með eða segið nei og farið frekar í hraðbanka. Ekki gefa eftir í svona tilvikum. 

Passið vel upp á hlutina ykkar á ströndinni. Þetta vitum við nú flest en samt sem áður sést stundum til fólks á sundfötunum einum saman á lögreglustöðinni að tilkynna þjófnað. Best er að vera með vatnshelt hulstur eða tóma flösku undan sólarvörn sem búið er að hreinsa að innan og nota hana undir lykla, peninga og þess háttar. Það er líka hægt að nota tómt ílát undan blautþurrkum. Skilja vegabréfin eftir á hótelinu (bílstjórinn þarf samt að hafa sitt vegabréf) og forðist að vera með mörg greiðslukort á ykkur í einu.

Í vatnsrennibrautagörðunum er hægt að leigja geymsluskápa fyrir allt sem má ekki blotna. Þeir eru inni hjá búningsklefunum og eru merktir á kort/leiðarvísi sem fylgir garðinum. Svo er hægt að sækja veski eða peninga áður en farið er að borða og skila svo aftur í skápinn fyrir næstu törn.

Lögreglan er vel sýnileg og það eru nokkrar lögreglustöðvar á ferðamannasvæðunum. Þar er yfirleitt einhver enskumælandi á vakt en utan helstu ferðamannastaða gæti þurft að hafa túlk með. Á myndinni má sjá lögreglumenn svæðisins, Policía Local, en ríkislögreglan er Policía Nacional. Einnig er algengt að lögregla sé óeinkennisklædd á vakt.

Sérstök aðgát skal höfð á Veronicas-svæðinu á Amerísku ströndinni. Sjá HÉR.

Góð regla er að vera ekki með mikið reiðufé á sér og ekki nema 1 greiðslukort, helst með lágri inneign. Við höfum flest gott aðgengi að netbönkum svo það ætti að vera lítið mál að skammta sér dag- eða vikupeninga á greiðslukortin.

Umferðin – Íslendingar geta fengið menningarsjokk yfir kurteisinni. Það er nánast alltaf stoppað fyrir fólki á gangbrautum og mikið tillit tekið til gangandi vegfarenda. 

Það hefur lengi verið varað við að versla raftæki eða dýra hluti af smásölum sem eru með litlar verslanir hér og þar á svæðinu. Það er full ástæða fyrir því að fararstjórar vara við þessu, enda hefur það margsannað sig að ef fólk freistast til að kaupa t.d. myndavél eða síma þá er eitthvað allt annað í kassanum þegar heim er komið. Í staðinn er hægt að fara í viðurkenndar raftækjaverslanir í verslunarmiðstöðvunum sem er öruggt að versla af, til dæmis í Alcampo, Gran Sur og El Corte Inglés.

RæðismaðurÍslands á Kanaríeyjum er í Las Palmas á Gran Canaria. Avenida de Canarias 22, Edificio Bitacora, Torre Norte
ES-35002 Las Palmas de Gran Canaria
Netfang: canaryislands@icelandconsulate.es
Sími: Landsnúmer 34 – (928) 365 870
Athugið að það þarf að hafa vegabréf á sér þegar farið er á milli eyjanna, þó þær tilheyri Kanaríeyjaklasanum.