Siam Park
Það er engin tilviljun að Siam Park vatnsrennibrautagarðurinn er hér fyrstur á listanum, enda hefur hann verið valinn sá besti í heimi undanfarin ár. Við mælum með að mæta snemma til að ná að fara í flestar brautirnar (og líka til að ná örugglega geymsluskáp). Það er hægt að leigja handklæði á staðnum og þarna eru nokkrir veitingastaðir. Börn undir 16 ára verða að vera í fylgd með fullorðnum.
Best er að kaupa miða fyrirfram en það er líka miðasala við innganginn. Þar eru bæði hraðbankar og posar. Þegar miðar eru keyptir á netinu þarf að mæta með þá útprentaða.
Hvað kostar í Siam Park?
Venjulegt verð fyrir fullorðna eru 38 evrur, 26 evrur fyrir 3-11 ára börn, frítt fyrir börn sem eru yngri en 3 ára. Frítt fyrir börn undir 6 ára þegar tvíburamiðar eru keyptir, sjá hér neðar. Sama verð gildir fyrir miða á Siam Night en þá er opið frá 8 á kvöldin til miðnættis, fyrir utan að þá þarf að kaupa miða fyrir 4-11 ára börn. Það eru nokkrar gerðir af miðum í boði, VIP, Premium og Winter, þar sem fylgir meðal annars blautbúningur og skápur með. Það eru líka sér tilboð fyrir hreyfihamlaða. (Athugið að verðin gætu hafa breyst.)
Ef þið ætlið líka í Loro Parque þá er hægt að kaupa „tvíburamiða“ (twin ticket) í báða garðana með afslætti. Tvíburamiði kostar 66 evrur fyrir fullorðna og 45,50 evrur fyrir 6-11 ára börn. Miðar sem eru keyptir á heimasíðu garðsins gilda í 1 ár frá kaupdegi. Athugið að nú er líka hægt að kaupa „þríburamiða“ sem gildir í þessa tvo garða plús Poema del Mar sædýrasafnið á Gran Canaria. Það er hægt að gera sér dagsferð þangað með ferjunni sem gengur á milli eyjanna. (Munið bara að taka með ykkur vegabréfin.)
Það er hægt að panta þessa miða fyrir fram á heimasíðu garðanna, ásamt miðum í Siam Park-strætóinn.
Þarna er frábært svæði sem er lokað af fyrir yngstu börnin, The Lost City (týnda borgin). Eldri börn fá ekki að fara inn á það, enda er nóg af öðrum brautum fyrir þau. Athugið að það eru skilti við allar brautir sem sýna aldurs- og/eða hæðartakmörk. Börn undir 16 ára verða að vera í fylgd með fullorðnum. Það er líka tekið fram ef brautirnar henta ekki fólki með hjarta- eða bakvandamál, til að gæta fyllsta öryggis.
Á svæðinu hjá veitingastöðunum er risastór öldulaug. Því nær sem þú ferð upptökunum á öldunum, því meiri líkur eru á að þær nái að fella þig. Það eru sundlaugaverðir í og við öldulaugina, eins og við öll svæðin.
Jafnvel smábörn geta leikið sér í öldulauginni næst „ströndinni“ (í umsjón fullorðinna auðvitað) og þar eru sólbekkir þar sem hægt er að slaka á eftir daginn.
Þess má geta að Siam Park býður upp á 5 vikna námskeið fyrir fólk sem vill gerast sundlaugaverðir. Nánari upplýsingar á heimasíðu Siam Park (undir recruitment).
Mikil gæsla er í garðinum og hann er mjög snyrtilegur. Í júlí og ágúst er garðurinn opinn á kvöldin milli kl. 20-24.
Tower of Power er ein svakalegasta rennibrautin á Kanaríeyjum. (14 ára aldurstakmark.) Hún er 28 metra há og 76 metra löng (Hallgrímskirkjan er 74,5). Fólk getur náð allt að 80 km hraða og ferðinni lýkur með því að renna í gegnum rör sem liggur undir hákarlalaug.