Veitingastaðir

Maturinn á Tenerife er almennt mjög góður og það er gott úrval af ferskum fiski og grænmeti. Við mælum með að prófa kanareyska rétti eða láta þjónana mæla með einhverju. Spænski rétturinn paella er til í nokkrum útgáfum og svo er alveg ómissandi að prófa tapas, hvort sem það er þegar farið er út að borða eða sem snarl á bæjarröltinu. Flestir staðir bjóða upp á grænmetisrétti og sumir vegan en það getur borgað sig að skoða staðina fyrst á TripAdvisor þar sem einhverjir staðir halda að nóg sé að bjóða upp á salat með tómat og gúrku og kalla það vegan- eða grænmetisrétt. En það eru sem betur fer fáar undantekningar. Það er í lagi að drekka drykki með klökum. Hefðbundnir drykkir eru í boði, allt frá vatni upp í eitthvað sterkara, þar af vín sem er gert á Tenerife. Spænski drykkurinn sangría er úr rauðvíni og ávöxtum, og minnir svolítið á kalt jólaglögg. Staðirnir sem eru nefndir hér eru flestir á aðal ferðamannasvæðinu.

Þjórfé

Svipað og á Íslandi þá er ekki regla að gefa þjórfé en flest fólk gerir það ef það er ánægt með þjónustuna og matinn. Sumir borga því ekkert aukalega meðan aðrir námunda upp í næstu 5-10 evrur eða bæta 5-10% við.

Chill Out við göngugötuna við Vistas-ströndina er einn af uppáhaldsstöðum Íslendinga. Þarna fæst tapas, ítalskur matur og fleira spennandi. Yngsta manneskjan sem hefur mælt með þessum stað var 6 ára. Chill Out er alveg upp við göngin yfir í Los Cristianos. Það er allt gott þarna og þjónustan frábær. Staðurinn fær stóran plús fyrir vandaðan barnamatseðil.

Einn af uppáhaldsstöðum Íslendinga er ítalski staðurinn Bianco en hann er á efri hæðinni á Safari-verslunarmiðstöðinni á „Laugaveginum.“

Limoncello veitingastaðurinn er við Torviscas-ströndina í Adeje. Staðurinn sérhæfir sig í sjávarréttum en býður meðal annars upp á steikur, pasta, pizzur og risotto.

Tapas-staðurinn La Casita De Taby er í Salytien, lítilli verslunarmiðstöð á Amerísku ströndinni, stutt frá Íslendingabarnum og með útsýni yfir sjóinn. La Casita De Taby býður líka upp á grænmetisrétti og vegan.

Imperial Tai-pan er veitingastaður sem er í eigu sömu aðila og Bianco. Boðið er upp á austurlenskan mat og sushi. Imperial Tai-pan er 10. besti veitingastaðurinn á Amerísku ströndinni samkvæmt TripAdvisor, með 4,5 stjörnur.

Í bleika pýramídanum beint á móti Bianco er Hard Rock. Það borgar sig að panta borð þar til að þurfa ekki að bíða lengi. Það er líka hægt að sitja úti og fylgjast með mannlífinu á Laugaveginum. Hard Rock er þekkt fyrir að vera mjög lifandi staður, með hátt stillta tónlist, sem hentar ekki öllum.

Það er æðislegur sushi staður ofarlega á Amerísku ströndinni, Taberna Sushi Amore, í næstu götu við Laugaveginn, Av. Antonio Dominguez. Við hliðina á honum er tapas staðurinn La Taberna de La Brasa.

Nokkrum metrum frá Taberna de La Brasa er ítalskur staður sem margir mæla með, ARDI. ARDI er í 6. sæti yfir bestu veitingastaðina á Arona-svæðinu, samkvæmt TripAdvisor, með 5 stjörnur.

Slow Boat er kínverskur veitingastaður sem margir mæla með. Það er líka boðið upp á grænmetisrétti. Staðurinn fær 4,5 stjörnur á TripAdvisor.

Tony Roma’s steikhús er vel þekkt fyrir frábærar nautasteikur og rif. Staðurinn er á Amerísku ströndinni, Fañabe við Costa Adeje og í Siam Mall.

Indverski staðurinn Bombay Babu á Fañabe svæðinu er mjög góður.

Það getur verið áskorun að finna góða hamborgara á eyjunni en það er hægt að fá mjög góða hamborgara á Chill Out (nema á kvöldin, nema það hafi breyst). Oftast eru hamborgarar úr eins konar kjötfarsi svo það er alveg markaður fyrir útibú frá einum af íslensku stöðunum hér!

Fínni veitingastaðir

Fyrir þau sem vilja fara fínt út að borða er úr nógu að velja. Meðal annars Arte del Gusto og Casa Tagoro, báðir í Los Cristianos, og El Molino Blanco á Amerísku ströndinni.

Aðrir miðlungsdýrir veitingastaðir sem henta líka fjölskyldum með börn eru til dæmis asíski staðurinn Spice Garden í La Caleta, Lagarto Brasserie, Lucky 7’s grillmatur og hamborgarar í Fañabe, og pizzastaðurinn Zena sem er rétt hjá Aqualand.

Vegna fjölda veitingastaða er góð hugmynd að leita á TripAdvisor. Þar eru ítarlegir leitarmöguleikar og til dæmis hægt að leita að vegan-stað á Amerísku ströndinni eða pizzu í Santa Cruz. Það er líka hægt að leita út frá stærð hóps, verðlagi eða dagsetningu. Leitarniðurstöður koma í númeraröð eftir meðmælum gesta. Hér er hægt að skoða veitingastaði á Tenerife, á síðu TripAdvisor. Vinstra megin á síðunni eru svo valmöguleikar.

Flestir veitingastaðir eru opnir um jólin. Hér er hægt að lesa meira um jól á Tenerife.