Ertu á leiðinni til Tenerife eða Kanaríeyja?

Ertu á leiðinni til Tenerife eða Kanaríeyja?

Þessar reglur gilda um ferðir frá Íslandi til Kanaríeyja

Þar sem Ísland er ekki á lista yfir áhættusvæði þegar þetta er birt þarf aðeins að sýna QR-kóða og bólusetningarvottorð við komuna til Tenerife. Það sama gildir um allar Kanaríeyjarnar. Athugið að þetta er birt með fyrirvara um breytingar, enda geta reglur breyst með litlum fyrirvara. Hér er hægt að skoða nýjustu reglur.

Varðandi eldgos sem er nýhafið á nágrannaeynni La Palma, má geta þess að það er ekki talið að það muni hafa nein áhrif á flugferðir til og frá eyjunum. (La Palma er eyja sem sést til frá norðurhluta Tenerife, t.d. þegar keyrt er að bænum Puerto de la Cruz.)

1 – Sækja um QR-kóða

Áður en haldið er af stað í ferðina þarf að hafa QR-kóða frá Spain Travel Health (SpTH). (Hann er svipaður og strikamerki.) Það þarf að hlaða honum niður í síma og sýna við brottför frá Íslandi og við komu til Kanaríeyja.

Það má sækja um QR-kóðann síðustu 48 tímana fyrir brottför. En það má fylla út eyðublaðið fyrr án þess að senda umsóknina strax. Best er að sækja um QR-kóðann í appinu SpTH því þá er auðveldara að vista og finna kóðann. En það má líka sækja um á heimasíðu SpTH (heimasíðan opnast í nýjum glugga).

Undir NEW FORM á að velja INDIVIDUAL fyrir einstakling eða FAMILY/GROUP fyrir fjölskyldu eða hóp sem ferðast saman. Ef fjölskylda sækir um saman er ein manneskja skráð sem ábyrgðaraðili hópsins í eyðublaðinu.

Í eyðublaðinu sem opnast þarf að fylla út eftirnafn (surname) og fornafn (name); vegabréfsnúmer (passport number); flugnúmer (flight number); komudag (arrival date); email og síðan staðfesta email. Reitina tvo fyrir neðan þarf aðeins að haka við ef þið eruð bara að millilenda á Kanaríeyjum/Spáni (efri reitur), eða ef eyðublaðið er fyllt út fyrir ólögráða einstakling (neðri reitur). Neðst þarf að haka við að þið séuð ekki vélmenni og svo á að staðfesta að þið hafið lesið og skilið skilmálana. Svo er ýtt á Send (ef það eru 48 tímar eða minna að brottför).

Að þessu loknu fáið þið sendan QR-kóða í tölvupósti með fyrirsögninni Spain Travel Health: Form registration.

Næst þarf að hlaða QR-kóðanum niður (vista) í síma. Ef þið sóttuð um á netinu og getið ekki opnað tölvupóstinn í símanum þá er hægt að fara inn á SpTH síðuna og smella á Retrieve QR. (Prentaðar útgáfur eru ekki leyfðar.)

2 – Bólusetningarvottorð eða PCR-próf

Fólk sem er bólusett þarf að sýna bólusetningarvottorð. Aðrir þurfa að sýna fram á neikvætt PCR-próf. Það þarf líka að sýna vottorð þegar fólk skráir sig inn á hótel.

Bólusetningarvottorð eru sótt inni á Heilsuvera.is undir „Mínar síður“ efst til hægri. Þar þarf að skrá sig inn með rafrænum skilríkjum. Til að framvísa bólusetningarvottorðinu erlendis verður vottorðið að vera á ensku, og það má vera á pappír eða rafrænu formi. Ef það er á rafrænu formi þarf að hlaða því inn þegar sótt er um QR-kóðann.

Sýnatöku fyrir PCR-próf er hægt að panta hér. Sýnataka fer fram á Suðurlandsbraut 34 í Reykjavík eða á Strandgötu 31 á Akureyri. Framvísa þarf vottorði um neikvætt PCR-próf ef fólk er ekki með bólusetningarvottorð. Kostnaður vegna sýnatöku er 7.000.

Börn undir 12 ára aldri þurfa ekki að sýna nein vottorð við komuna til Kanaríeyja. Þau þurfa samt að vera skráð með sínum forráðamönnum á QR-kóðanum.

Bólusettir ferðamenn þurfa ekki að framvísa neikvæðu PCR-prófi (Covid-prófi). Kortið hér til hliðar er af vef Sherpa.


Hér er stutt myndband frá Spain Travel Health til að útskýra umsóknarferlið á myndrænan hátt.

Ef fólk sýnir flensueinkenni við komu til eyjanna getur það átt von á því að vera tekið í heilsufarsskoðun (mæling á hita o.þ.h.). Nánari upplýsingar um kröfur flugfarþega fyrir komu til Kanaríeyja er að finna á heimasíðu yfirvalda eyjanna Canary Islands. Athugið að reglur Kanaríeyja geta að einhverju leyti verið frábrugðnar reglum um Spán, þar sem eyjarnar eru sjálfstæð eining innan Spánar.

3 – Við komuna til Íslands

Allir sem koma til Íslands þurfa að skrá sig hér: Heimkoma.

Íslenskir ríkisborgarar þurfa ekki að fara í Covid-próf við heimkomuna ef þeir geta framvísað bólusetningarvottorði. Hins vegar er mælt með að fólk með tengslanet á Íslandi (hvort sem það eru Íslendingar eða aðrir) fari í skimun innan 48 klst frá komu. Það er í lagi að fara með flugrútunni frá flugvellinum.

Booking.com

Varasjóður

Á öllum ferðalögum erlendis á Covid-tímum ættu ferðalangar að eiga smá varasjóð til að grípa í ef eitthvað óvænt kemur upp á, hvort sem fólk er með góða ferðatryggingu eða ekki. Reglur geta breyst mjög hratt, eins og við höfum séð, rétt eins og faraldurinn. Ef til þess kemur að reglur eða annað breytist meðan á ferðinni stendur, getur komið sér mjög vel að hafa gert ráð fyrir aukaútgjöldum, t.d. vegna Covid-prófa, niðurfellingu á flugferðum, sóttkvíar, auka hótelkostnaðar og annarra óvæntra útgjalda. Auk þess er gott að hafa evrópska sjúkratryggingakortið ef þið veikist eða slasist á ferðalaginu. Sjá nánar hér um Tryggingar og Neyðartilvik.